వందనం
వందనం
సంగీత సాహిత్యాల్లానే
వ్యాపార రాజకీయాలు
పుట్టుకతో అబ్బాల్సిన విద్యలు
శ్రద్ధతో కూడిన పాండిత్యం
ఒకదానిలో ఉంటే
పరిశీలనతో కూడిన లౌక్యం
వేరొక దానిలో ఉంటుంది
శాస్త్రం చదివి కొత్తదనాన్ని
ఆవిష్కరిస్తారు ఒకరు
కొత్త దనాన్ని ఆవిష్కరించి
శాస్త్రం రాసుకోమంటారు ఒకరు
లాలిత్యం ఒకరిది
దృఢత్వం ఒకరిది
అభిరుచి ఉన్నవారు
మొదటివారిని అనుసరిస్తే
అవకాశాలు వెతికే వారు
రెండో వారిని అనుసరిస్తారు
ఇద్దరికీ చప్పట్లు కొడతారు
దానికే పొంగి ధనం తృణప్రాయం
అంటారు ఒకరు
పెరిగిన చప్పట్లతో ధనసృష్టి
చేస్తారు ఒకరు
సరస్వతిని సృష్టించేది ఒకరు
లక్ష్మీ దేవిని సృజించేది ఒకరు
ఒకరిమీద ఒకరు ఆధారపడతారు
జనబాహుళ్యాన్ని ప్రభావితం చేస్తారు
సరస్వతీ పుత్రులకి
లక్ష్మీ పుత్రులకి
వందనం
ఎందుకంటే వాళ్ళే
- సమాజాన్ని నడిపిస్తున్నారు.
